少女儲13萬被父母全數替哥哥還債!並辱罵少女不孝順

静静,花开了 2020/09/15 檢舉

聽過一句說話,一個人真正成長唔係喊得最慘嗰個夜晚,而係忍住冇喊嗰個夜晚。
=======
投稿讀者:欣
我讀書唔叻,冇學歷,畢業後一直搵唔到工,結果去咗便利店做,人工13,000左右,有個小小嘅目標同埋理想,就係開一間美甲店,因為呢樣係自己嘅興趣。
阿爸阿媽一直都重男輕女,對屋企個爛賭阿哥好容忍,對我就完全唔同,最直接一個例子就係阿哥幾年嚟都冇返工,係完全唔搵工嗰隻,試過有親戚朋友介紹工作畀佢都唔做,起碼7年冇做嘢,主要職責就係賭錢,賭波賭馬樣樣齊。


唔返工邊有錢賭?佢嘅賭本咪就係我畀屋企嘅家用囉!
一萬三千幾人工,佢哋規定我要畀7,000家用,剩低6千幾除咗用嚟搭車同埋食飯,仲有上堂學一啲美甲同修眉嘅課程,化妝班都有上,我仲可以剩低啲錢儲嚟開舖,有時覺得自己算係咁,當然,好多時去到20幾號已經係三餐捱麵包,阿爸阿媽亦從來唔煮飯。
爛賭阿哥每個月攤大手板問屋企攞錢,有時佢輸好多仲會額外再問,我自己點都唔會再畀,但係阿爸阿媽畀完佢之後,就會用其他理由問我拎更多家用,所以好多時唔止畀7,000,搞到儲錢儲得好慢。
我足足用咗4年時間先儲到134,400,雖然唔多,不過盡曬力喇,睇好舖位,搵咗一啲必需嘅器材,我打算辭咗便利店份工,全心全意發展自己嘅事業,正當我同阿爸阿媽講咗意向之後,阿哥就話自己賭外圍輸大錢,欠債十幾萬,後來亦真係有人上嚟屋企淋紅油,日日塞鎖匙窿同埋電話滋擾。

阿媽話既然我有錢開舖,即係有多餘錢,叫我拎出嚟幫阿哥還債,我唔肯,呢啲係死慳死抵儲返嚟嘅血汗錢,入面有自己嘅人生方向,多次拒絕之後,竟然冇人怪責阿哥賭錢,反而怪我唔拎錢出嚟幫手還債。
受盡冷言冷語,我喺屋企好大壓力,有一晚阿爸趁我瞓緊覺走入房扯我頭髮,迫我一定要拎曬啲錢出嚟幫阿哥,我有反抗但唔夠佢大力,仲食咗佢幾巴掌,阿爸話女仔人家學咩人講理想?學咩人講事業?阿媽袖手旁觀喺側邊一路附和,永遠記得我阿爸講咗一句:「生錯咗呢個僕街女!」
我知道當時得兩條路行,一係畀佢打死,就算今晚唔死,聽晚後晚大後晚都隨時喺睡夢中畀人扯頭髮,另一條路就係拎曬13萬出嚟畀我阿哥還債。
雖然阿爸阿媽由細到大都冇負過任何責任,我小學時期已經一個人返學放學,不過呢13萬我想當做最後一次為呢個家付出,拎曬開舖嘅錢出嚟畀佢哋還債,我個身得返4,400蚊,好老實講,真係諗過自殺,聽到「生錯咗呢個僕街女!」嗰晚,曾經想衝上大廈天臺就咁跳落去,但我知道唔值得,要死好容易,要生存先至最難,我唔甘心,結果喺一件衫都冇拎嘅情況下,我離開咗呢個家,亦都唔再留戀呢個家。
好多謝當時有朋友收留咗我大半個月,拎住身上僅餘嘅4,400蚊,再加一個月嘅便利店人工,喺土瓜灣租咗間劏房住,可能我仲未知道前路應該點行,重新再儲一嚿錢亦係好漫長嘅事,不過我起碼得到解脫,人生唔再需要為他人作嫁衣裳。
有親戚打過嚟話我不孝,丟低屋企就咁走咗去,換轉係以前我一定會喊住解釋,但係經過呢一次,我冇再喊喇,只係覆返一句:「問心無愧!」然後索性換埋電話號碼。
我係一個人辦,唔夠聰明,唔夠決心,愚孝。
送上一個遲嚟嘅領悟---生活本身已經唔容易,要趁早擺脫同埋遠離嗰啲垃圾人,否則將來條路會更加難行。

原文:辦公室日報

你可能會喜歡
X
檢舉
請使用真實的郵箱如無法和您取得聯繫我們將無法對您的檢舉進行處理